Төрага
Джумагазиев Чынгыз Джумагазиевич
Кыргыз Республикасынын курулуш жана курулуш материалдары өнөр жайынын кызматкерлеринин кесиптик бирлиги
Кыргыз Республикасынын курулуш жана курулуш материалдары өнөр жайынын кызматкерлеринин кесиптик бирлиги бир нече ирет өзгөртүп түзүүгө, реформалоого жана аталышын өзгөртүүгө учураган. Профсоюздардын бүткүл союздук борбордук кеңешинин (ВЦСПС) IV Пленумунун жана Кыргыз ССРнин коммуналдык-турак жай курулуш кызматкерлеринин кесиптик бирлигинин Борбордук комитетинин IX бириккен Пленумунун чечими менен 1934-жылдын 30-октябрында «Промжилкомстроительства» жумушчулардын кесиптик бирлиги өз алдынча үч кесиптик бирликке бөлүнгөн. Натыйжада төмөнкү кесиптик бирликтер пайда болгон:
– Коммуналдык-турак жай курулуш кызматкерлеринин кесиптик бирлиги;
– Оор өнөр жай курулушунун кызматкерлеринин кесиптик бирлиги;
– Курулуш, жеңил жана тамак-аш өнөр жайынын кызматкерлеринин кесиптик бирлиги;
1934-жылдын 30-октябры – Коммуналдык-турак жай курулуш кызматкерлеринин кесиптик бирлиги түптөлгөн күн. Кесиптик бирликтин жетектөөчү органы болуп, ошол эле 1934-жылдын 30-октябрында шайланган Борбордук комитет эсептелген. 1948-жылдын 19-октябрында ВЦСПСтин XIX Пленумунун чечиминин негизинде Кыргыз ССРнин кесиптик бирликтеринин союзаралык конференциясы өтүп, анда Кирсовпроф кесиптик бирликтеринин Кыргыз республикалык кеңешин түзүү жөнүндө чечим кабыл алынган.
1956-жылдын 10-июлунда Коммуналдык-турак жай курулуш кызматкерлеринин кесиптик бирлигин Кыргыз шаар жана айыл курулушу кызматкерлеринин республикалык кесиптик бирлиги менен кошуу жөнүндө ВЦСПСтин 3-чечими кабыл алынган. Ошол учурдан тарта кайрадан түзүлгөн кесиптик бирлик Кыргыз шаар жана айыл курулушу кызматкерлеринин республикалык кесиптик бирлиги деп аталып, бул аталыш менен 1957-жылдын 19-августуна чейин иш алып барган.
1957-жылдын 19-августунда шаар жана айыл курулушу кызматкерлеринин кесиптик бирлиги менен курулуш материалдары өнөр жайынын кызматкерлеринин кесиптик бирлигин кошуунун натыйжасында Кыргыз курулуш жана курулуш материалдары өнөр жайынын кызматкерлеринин республикалык кесиптик бирлиги пайда болгон. Өзгөртүлүп түзүлгөн кесиптик бирликтин жетектөөчү органы болуп, Кыргыз курулуш жана курулуш материалдары өнөр жайынын кызматкерлеринин кесиптик бирлигинин республикалык комитети дайындалган.
1990-жылы Курулуш жана курулуш материалдары өнөр жайынын кызматкерлеринин кесиптик бирлигинин республикалык комитетинин биринчи съезди өтүп, съездде кесиптик бирликтин жаңы Уставы кабыл алынган. Кийинчерээк 1995-жылдагы II съезддин чечими боюнча Уставга өзгөртүүлөр менен толуктоолор киргизилген. Ошол учурдан тартып, тармактык кесиптик бирлик Кыргыз Республикасынын курулуш жана курулуш материалдары өнөр жайынын кызматкерлеринин кесиптик бирлиги деп аталып калган.
Өз ишмердүүлүгүн жүргүзүүдө тармактык кесиптик бирлик Кыргыз Республикасынын Конституциясы менен мыйзамдарын жетекчиликке алат, мамлекеттик бийлик жана чарбалык башкаруу органдарына отчёт берүүгө милдеттүү эмес жана алар тарабынан контролдонбойт, саясий партиялардан жана башка коомдук уюмдардан көз каранды эмес. Алар менен теңдик, өз ара сый-урмат, кызматташтык жана консолидация принциптеринин негизинде мамиле түзөт.
Кесиптик бирликтин катарында ыктыярдуу негизде кирген долбоорлоо, курулуш жана курулуш материалдары өнөр жайында иш алып барган менчиктин жана чарбанын ар кандай формаларына ээ ишканалардын, мекемелердин жана уюмдардын кызматкерлери, ошондой эле Кыргыз Республикасынын аймагындагы орто жана кесиптик техникалык окуу жайларынын окуучулары бар.
Тармактык комитеттин Уставында курулуш жана курулуш материалдары өнөр жайынын кызматкерлеринин кесиптик бирлигинин негизги милдети болуп, кызматкерлердин жана эмгек жамааттарынын кесиптик, эмгектик, социалдык, экономикалык, укуктук кызыкчылыктарын коргоо эсептелет деп жазылган.
Кесиптик бирликтин негизин ишкананын же уюмдун ичинде уюштурулган баштапкы кесиптик бирлик уюмдары түзөт. Кесиптик бирликтин структурасына облустук кесиптик бирликтер кирип, алардын жогорку органы болуп, конференциялар эсептелет. Өзүнүн Пленумунда Комитет Президиумду шайлап, анын иштөө тартибин белгилейт.
Курулуш жана курулуш материалдары өнөр жайынын кызматкерлеринин кесиптик бирлигинин жогорку органы – Республикалык комитет тарабынан беш жылда жок дегенде бир жолу чакырылуучу Съезд.
Республикалык комитет республиканын аймагында жана андан тышкары жерлерде иш алып барат, чет өлкөлүк өнөктөштөр менен кызматташууну жана тажрыйба алмашууну ишке ашырат, кесиптик бирликтин эл аралык ишмердүүлүгүн уюштурат.
Курулуш жана курулуш материалдары өнөр жайынын кызматкерлеринин кесиптик бирлиги кийинкидей уюмдар менен кызматташат: BWI- Курулуш жана жыгач иштетүү тармагынын кызматкерлеринин интернационалы, Курулуш жана курулуш материалдары өнөр жайынын кызматкерлеринин кесиптик бирликтеринин эл аралык конфедерациясы (МКП “Строитель”), Белорусиянын Курулуш жана курулуш материалдары өнөр жайынын кызматкерлеринин кесиптик бирлиги.
Байланыш маалыматтары: (312) 61‒32‒16, (312) 61‒32‒18
Биздин дарек: Бишкек ш., Чүй пр., 207, 20-каб.