2024-жылдын 1-октябрынан тартып, борбор калаанын базарларында иштеген жарандар үчүн актуалдуу дарттарга экспресс-тесттерди акысыз тапшыруу мүмкүнчүлүгү пайда болду.
Эмгекчилер АИВ инфекциясы, В жана С вирустуу гепатиттери, артериялык гипертензия жана котон жара сыяктуу ооруларды аныктоо боюнча анализдерди тез жана жеткиликтүү жол менен тапшырып, мобилдик клиниканын дарыгерлеринен консультация ала алышат.
Акция Кыргызстан кесиптик бирликтер федерациясынын, соода, коомдук тамактануу жана ишкердиктин башка формаларында эмгектенген кызматкерлердин кесиптик бирлигинин, саламаттык сактоо кызматкерлеринин кесиптик бирлигинин демилгеси боюнча, КР Саламаттык сактоо министрлигинин колдоосу жана көмөктөшүүсү менен уюштурулду.
Мобилдик клиника өз имшемрдүүлүгүн «Мадина» базарынан баштады. Кесиптик бирликтин мүчөлөрү анализдерди саат 9-00дөн саат 15-00гө чейинки убакыт аралыгында тапшыра алышат. Мобилдик клиниканын медициналык кызматкерлеринин айтуусу боюнча, бир күндө 100гө жакын киши анализ тапшырып, текшерүүдөн өтө алат.
Кесиптик бирликке мүчө болгон эмгекчилер терең ыраазычылык билдирүү менен, базарда иштегендердин баарында эле анализ тапшырууга жана адистерден консультация алууга мүмкүнчүлүгү жана убактысы жетпей турганын айтышты. Эми аларда жумуштан алыстабай туруп, ден соолугун текшертүүгө мүмкүнчүлүк жаралды.
Мобилдик клиника бир айдын ичинде борбор калаанын бардык базарларына жана соода түйүндөрүнө барып, акысыз кызмат көрсөтө турганын белгилей кетмекчибиз.
Мобилдик клиниканын жарандарды кабыл алуу графиги:
1-октябрь – 3-октябрь «Мадина» СБК
7-октябрь – «Таатан» СБК
9-октябрь – 11-октябрь – «Дордой-Дыйкан», «Дордой-Моторс» СБК
14-октябрь – 16-октябрь – «Аламүдүн», «Табылга» СБК
24-октябрь – 26-октябрь – «Орто-Сай» СБК