2024-жылдын 8-июлунда Кыргызстан кесиптик бирликтер федерациясында КР Министрлер кабинети, Кыргызстан кесиптик бирликтер федерациясы жана иш берүүчүлөрдүн бирикмелеринин ортосундагы 2022-2024-жылдарга Башкы макулдашуу боюнча Республикалык үч тараптуу комиссиянын талкуусу болуп өттү.
Жолугушууга КР Министрлер кабинетинин төрагасынын орун басары Эдил Байсалов, КР Эмгек, социалдык камсыздоо жана миграция министри Жылдыз Полотова, Кыргызстан кесиптик бирликтер федерациясынын төрагасы Мурадил Жумадилде уулу, КР Соода-өнөр жай палатасынын өкүлү Чолпон Бейшеналиева, JIA бизнес-ассоциациясынын төрагасы Жоодар Омошев, техникалык жана укуктук инспекторлор, жергиликтүү мамлекеттик жана ведомстволук адистер катышты.
Катышуучуларга салам жолдоо менен, Республикалык үч тараптуу комиссиянын (РҮК) координатору Эдил Байсалов, Министрлер Кабинети тарабынан жарандардын жыргалчылыгын жакшыртууга багытталган маанилүү чаралар көрүлүп жатканын: кызматкерлердин эмгек акысы көбөйтүлгөнүн, пенсиялык камсыздандыруу, эмгек ресурстарынын экспорту боюнча маселелер каралып жатканын, ошондой эле 2025-2027-жылдарга Башкы макулдашуунун долбоорун иштеп чыгуу аракети көрүлүп жатканын белгиледи.
Өз кезегинде, Жылдыз Полотова Башкы макулдашуунун алкагында жана Эл аралык эмгек уюмунун №190 Конвенциясын ратификациялоо жаатында аткарылган иштер тууралуу маалымат берди. Министрлер Кабинетинин №151 Токтомунун негизинде кош бойлуулук жана төрөт боюнча жөлөкпулдун өлчөмү көбөйгөнүн, ошондой эле эмгек акыларын өндүрүп алуу боюнча иштер жүргүзүлүп жатканын белгилеп өттү.
ККБФ төрагасы Мурадил Жумадилде уулу катышуучуларга Кыргызстан кесиптик бирликтер федерациясында жүргүзүлүп жаткан санариптештирүү жана оптимизациялоо иштери, кесиптик бирликтердин Облустук кеңештеринин ККБФ өкүлчүлүктөрүнө өзгөртүлүп түзүлгөнү, техникалык инспекторлор коопсуз жана ден соолукка зыян келтирбей турган эмгек шарттарынын сакталышына коомдук көзөмөл жүргүзүп, алардын уюмдар менен мекемелердин жамааттык келишимдерде толук чагылдырылышына көмөктөшкөндүктөн, кырсыктар болгон жерлерге барып, керектүү жардамды көрсөткөндүктөн, федерациянын ичинде жана өлкөнүн бардык аймактарында эмгектик жана укуктук инспекторлордун санынын көбөйтүлгөндүгү жөнүндө айтып берди. Мындан тышкары, кесиптик бирликтин бардык мүчөлөрүнө өз убагында керектүү жардамдардын көрсөтүлүшүн камсыздоо үчүн кесиптик бирликтеги жаш кызматкерлерди окутуу жана алардын квалификациясын жогорулатуу боюнча курстар өткөрүлүп жатканын, ошондой эле, быйылкы жылдын аягына чейин ЭЭУнун 4 конвенциясын ратификациялоо пландалып жатканын билдирди. Эл аралык кызматташтыкты жана Борбор Азия өлкөлөрүнүн улуттук кесиптик борборлору менен өз ара аракеттешүүнү чыңдоо боюнча иштер аткарылганын айтып өттү.
Мурадил Жумадилде уулу, Кесиптик бирликтер федерациясын Республикалык үч тараптуу комиссиянын катчылыгына көрсөтүү боюнча сунуш киргизди. Себеби, ККБФнын башкы максаты – эмгекчилердин укуктарын коргоо жана эмгекти коргоо.
Үч тараптуу комиссиянын ишинин жүрүшүндө Жоодар Омошев формалдуу эмес экономикадан формалдуу экономикага өтүү, иш берүүчүлөр менен жумушчулардын ортосунда аянтча катары кызмат кыла турган вакансиялар жарманкесин өткөрүү, эмгекчилерди өлкөдө алып калуу жолдорун анализдөө маселелерин көтөрүп чыкты.
КР Министрлер кабинети, Кыргызстан кесиптик бирликтер федерациясы жана иш берүүчүлөрдүн бирикмелеринин ортосундагы Башкы макулдашуу – коомдук маанидеги документ болуп саналарын белгилей кетмекчибиз. Себеби документтин адамдардын эмгек укуктарын толук коргоо жана кепилдөө максатында экономиканын жана социалдык чөйрөнүн ар кандай тармактарында иштеген өлкө жарандарынын кызыкчылыктарына түздөн-түз тиешеси бар. Мындан тышкары, макулдашуунун бардык катышуучуларына чыныгы өнөктөштөр катары иш-аракет аткарууга мүмкүндүк берет.