Бүгүн Кыргызстан кесиптик бирликтер федерациясынын төрагасы
Мурадил Джумадилде уулу Москва районунун билим берүү тармагынын профсоюзунун баштапкы уюмдарынын төрагалары менен жолугушту.
Жолугушуу семинар форматында өтүп, анда кесиптик бирликтердин учурдагы ишмердүүлүгү, эмгекчилердин укуктарын коргоо маселелери жана тармактагы актуалдуу көйгөйлөр талкууланды.
Иш-чарага ошондой эле Билим берүү кызматкерлеринин кесиптик бирлигинин төрагасы Саламат Боёнов катышты.
Семинардын жүрүшүндө Мурадил Джумадилде уулу Федерация тарабынан жүргүзүлүп жаткан иштер тууралуу кеңири маалымат берди. Ал профсоюздардын негизги милдети — эмгекчилердин укуктарын жана социалдык-экономикалык кызыкчылыктарын коргоо экенин белгиледи.
«Кесиптик бирликтер – бул жөн гана уюм эмес. Бул ар бир кызматкердин үнү. Биздин башкы максат – мугалимдердин жана билим берүү тармагындагы кызматкерлердин эмгек укуктарын коргоо, алардын татыктуу эмгек шарттарын камсыз кылуу жана социалдык кепилдиктерин бекемдөө», — деди ал өз сөзүндө.
Ошондой эле төрага жамааттык келишимдерди түзүү, эмгек мыйзамдарынын сакталышын көзөмөлдөө жана кызматкерлерге укуктук жардам көрсөтүү багытындагы иштерге токтолду.
Семинар интерактивдүү форматта өтүп, катышуучулар өздөрүн кызыктырган суроолорду берип, тиешелүү жоопторду алышты. Суроолор эмгек акы, социалдык төлөмдөр, эмгек шарттары жана профсоюздук дисконттук карталарга байланыштуу болду.
Өз кезегинде Саламат Боёнов билим берүү тармагындагы кесиптик бирликтердин ролу күчөп жатканын белгилеп, баштапкы уюмдардын активдүүлүгү жалпы системанын натыйжалуулугуна түздөн-түз таасир этерин айтты.
Семинардын жыйынтыгында профсоюздардын ишин мындан ары күчөтүү жана баштапкы уюмдардын ишмердүүлүгүн жакшыртуу боюнча сунуштар айтылды.
