2026-жылдын 26-февралында Куралдуу күчтөрдүн жана укук коргоо органдарынын ардагерлеринин жана жарандык кызматкерлердин кесиптик бирлиги тарабынан мазмундуу жана маалыматтык презентация өткөрүлдү. Иш-чараны аталган кесиптик бирликтин төрагасы Асылбек Молдобаев ачты.
Иш-чарага күч түзүмдөрүнүн ардагерлери жана Куралдуу күчтөрдүн жарандык персоналы катышты.
Жолугушууга ошондой эле Кыргызстандын кесиптик бирликтер федерациясынын төрагасы Мурадил Джумадилде уулу жана мамлекеттик, муниципалдык мекемелердин жана коомдук тейлөө кызматкерлеринин кесиптик бирлигинин төрагасы Кубанычбек Намазов катышты.
Өз сөзүндө Мурадил Джумадилде уулу төмөнкүлөрдү белгиледи:
«Бул кесиптик бирлик — Куралдуу күчтөрдүн жана укук коргоо органдарынын ардагерлеринин жана жарандык кызматкерлеринин кызыкчылыктарын коргогон маанилүү аянтча. Алардын эмгеги мамлекеттин өнүгүшүнө жана коопсуздугуна кошкон олуттуу салым болуп саналат. Биз мындан ары да алардын укуктарын коргоого, социалдык кепилдиктерин бекемдөөгө ар тараптуу колдоо көрсөтө беребиз»- деди ал.
Презентациянын жүрүшүндө аталган кесиптик бирликтин төрагасынын орун басары Анвар Сартаев катышуучуларга 2026-жылга карата комитеттин негизги милдеттерин тааныштырды.
«Тармактык кесиптик бирлик түзүү; Жогорку Кеңештин “Эл аралык иштер, коргоо, коопсуздук жана миграция” комитетинин курамына ардагерлерди киргизүү; Кыргызстан кесиптик бирликтер федерациясы менен Министрлер Кабинетинин ортосундагы Башкы макулдашууга Куралдуу күчтөрдүн ардагерлерин жана жарандык кызматкерлердин социалдык камсыздоо жана укуктук коргоо боюнча жоболорду киргизүү; аталган кесиптик бирлик менен Кыргыз Республикасынын Коргоо министрлигинин ортосунда (кийин башка күч түзүмдөрү менен да) жамааттык келишимди даярдоо жана кол коюу; Кыргыз Республикасынын Эмгек кодексинин 188-беренесин ишке ашыруу; “Тулпар” картасы аркылуу ардагерлердин коомдук транспортто акысыз жүрүүсүн талап кылуу; кесиптик бирликтин мүчөлөрүнүн пенсияларын жогорулатууга салым кошуу; Кыргыз Республикасынын “Согуштун, Куралдуу күчтөрдүн ардагерлери жана ооруктагы эмгекчилер жөнүндө” мыйзамын толук көлөмдө ишке ашыруу; Бишкек шаарынын мэриясы тарабынан “Офицерлер үйү” үчүн имарат бөлдүрүү— мына ушуларды негизги багыттарыбыз деп бейгилейбиз. Федерациянын жетекчилигине көрсөткөн колдоосу жана жардамы үчүн ыраазычылык билдиребиз, алдыбызга коюлган бардык милдеттер ишке ашат деп ишенебиз», — деп жыйынтыктады ал.
Иш-чаранын алкагында кесиптик бирликтин мүчөлөрүнүн укуктарын коргоо, алардын социалдык камсыздоосун жакшыртуу, медициналык тейлөөнү өнүктүрүү жана коомдук колдоону күчөтүү маселелерине өзгөчө көңүл бурулду.
Жыйынтыгында катышуучулар кызматташууну мындан ары да бекемдөө жана ардагерлерди колдоого багытталган биргелешкен демилгелерди ишке ашыруу тууралуу макулдашышты.
Белгилей кетүүчү жагдай, мындай багыттагы кесиптик бирлик КМШ өлкөлөрүндө аналогу жок, ушуга окшош уюм Россия Федерациясында гана түзүлгөн.
