Жалал-Абад облусундаөткөрүлгөн маалыматтык кампания жаштардын эмгек укуктары темасына, ошондой эле Германиядагы дуалдык билим берүү мүмкүнчүлүктөрүнө жана анын жаштардын кесиптик калыптанышындагы маанисине арналды. Иш-чаралар биздин өнөктөштөр — DVV International Kyrgyzstan уюму менен биргеликте уюштурулду.
Бул демилгенин алкагында аймактагы 3 колледжде жана 6 кесиптик лицейде жолугушуулар жана түшүндүрүү сессиялары өткөрүлдү. Иш-чараларга 500дөн ашуун студент катышты.
Семинарлардын жүрүшүндө Кыргыз Республикасынын Кесиптик кошуундар федерациясынын Жаштар кеңешинин төрагасы Кайрат Тороев жаш кызматкерлердин негизги эмгек укуктары тууралуу кеңири маалымат берди. Ал расмий жумушка орношуу тартибин, эмгек келишимин түзүүнүн өзгөчөлүктөрүн, мыйзамсыз жумуштан бошотуудан коргонуу механизмдерин жана кызматкерлердин кызыкчылыктарын коргоодо профсоюздардын ролун түшүндүрдү. Ошондой эле эмгекти коргоо маселелерине жана эмгек рыногуна чыкканда укуктук сабаттуулуктун маанисине өзгөчө көңүл бурулду.
Мындан тышкары катышуучуларга Германияда ийгиликтүү колдонулуп келе жаткан дуалдык билим берүү системасынын артыкчылыктары тууралуу маалымат берилди. Бул система теориялык билимди жумуш ордундагы практикалык даярдык менен айкалыштырат.
Ар бир семинардын соңунда алынган билимдерди бекемдөө үчүн Kahoot! платформасында интерактивдүү оюн өткөрүлдү. Эң жакшы жыйынтык көрсөткөн үч катышуучу сыйлыктар менен сыйланды.
Белгилей кетүүчү нерсе, бул маалыматтык кампания өлкөнүн бардык аймактарында өткөрүлүп, барган сайын көбүрөөк жаштарды камтууда.
Мындай иш-чаралар жаштарга жумушка орношууда көбүрөөк маалыматтуу, ишенимдүү жана укуктары корголгон болууга жардам берет.
