Ош шаарындагы лицейлердин жана колледждердин студенттери үчүн эмгек укуктары боюнча билим берүү кампаниясы уюштурулду. Иш-чараны Кыргызстан кесиптик бирликтер федерациясынын Жаштар кеңешинин төрагасы Кайрат Тороев өткөрдү.
Жолугушуунун негизги максаты — жаштардын эмгек укуктары тууралуу маалыматын жогорулатуу жана аларды жумуш берүүчүлөр менен болгон мамилелерде өз укуктарын билүүгө үйрөтүү болду. Кампаниянын жүрүшүндө Кайрат Тороев студенттерге эмгек мыйзамдарынын негизги жоболору, жаш кызматкерлердин укуктары жана милдеттери тууралуу кеңири маалымат берди. Иш-чарага жалпысынан 410 окуучу катышышты.
Жолугушуу ачык форматта өтүп, студенттер өздөрүнүн көйгөйлөрү жана суроолору менен бөлүшүүгө мүмкүнчүлүк алышты.
Иш-чаранын жүрүшүндө катышуучулар эмгек келишимдери, иш убактысы, мыйзамдуу эмгек шарттары жана жумуш берүүчүлөр менен болгон мамилелер тууралуу суроолорун берип, аларга кеңири жооп алышты.
Жолугушуунун соңунда студенттер үчүн билимди бекемдөө максатында Kahoot интерактивдүү оюну өткөрүлдү. Оюн студенттердин чоң кызыгуусун жаратып, эмгек укуктары боюнча алган билимдерин текшерүүгө жана бекемдөөгө жардам берди.
Иш-чаралар биздин өнөктөштөр — DVV International Kyrgyzstan уюму менен биргеликте уюштурулду.
