Кыргызстан кесиптик бирликтер федерациясынын төрагасы Мурадил Джумадилде уулу мониторинг иш-чараларынын алкагында Бишкек шаарындагы №8 жана №72 бала бакчаларында, ошондой эле №8 жана №13 жалпы билим берүүчү мектептерде болду.
Иш сапардын жүрүшүндө Федерациянын төрагасы билим берүү мекемелеринин эмгек жамааттары менен жолугушуп, алардын көйгөйлөрүн жана сунуш-пикирлерин укту. Өзгөчө билим берүү мекемелеринде жүргүзүлүп жаткан оңдоо иштерине мугалимдердин тартылып жатканы, эмгек өргүүсүнө байланышкан маселелер, эмгек мыйзамдарынын сакталышы жана кызматкерлердин социалдык кепилдиктери боюнча көйгөйлөр көтөрүлдү.
Мониторингге ошондой эле Билим берүү жана илим кызматкерлеринин кесиптик бирлигинин Борбордук комитетинин төрагасы Саламат Боёнов жана Бишкек шаардык билим берүү кызматкерлеринин кесиптик бирлик комитетинин төрагасы катышышты.
Жолугушуунун жыйынтыгында көтөрүлгөн ар бир маселе боюнча тиешелүү тапшырмалар берилди. Тармактык кесиптик бирликке жана Бишкек шаардык комитетине тиешелүү мекемелердин жетекчилери жана мамлекеттик органдар менен биргеликте бардык көйгөйлөрдү чечүү боюнча иштерди жүргүзүү айтылды. Берилген суроолордун аткарылышы Федерациянын төрагасынын жеке көзөмөлүнө алынды.
Мурадил Джумадилде уулу, жолугушунун жүрүшүндө:
«Биздин негизги максатыбыз – кызматкерлердин ар бир кайрылуусуна өз убагында жооп берип, көтөрүлгөн маселелердин чечилишине жетишүү. Бүгүн айтылган бир дагы көйгөй көңүл сыртында калбайт. Ар бир маселе боюнча тиешелүү иштер аткарылат, маселелер толук чечилгенге чейин иш алып барабыз. Билим берүү кызматкерлеринин эмгек укуктарын коргоо – биздин башкы милдеттерибиздин бири», -деп белгиледи ал.
