2024-жылдын 19-21-сентябрында Ысык-Көл облусунун Сары-Ой айылында Кыргызстан кесиптик бирликтер федерациясынын биринчи Спартакиадасы өттү. Масштабдуу спорттук иш-чара Кыргызстан кесиптик бирликтер кыймылынын 100 жылдык юбилейинин урматына уюштурулду. 

Спартакиаданын программасына спорттун 9 түрү: мини-футбол, волейбол, стол тенниси, шахмат, бильярд, чуркоо кирген. Мындан тышкары, таяк тартыш, кол күрөш, аркан тартыш сыяктуу улуттук оюндар боюнча дагы мелдештер өткөрүлдү.

«Барчын» БДЧК базасы  жарыштар, пайдалуу билимдер жана эмгекчилердин эстен кеткис эс алуулары үчүн аянтча болуп берди.

Спартакиадага Кыргызстандын бардык аймактарынын кесиптик бирликтеринин жана ККБФ тармактарынын мүчөлөрү катышты. Жалпысынан иш-чара өлкөнүн 350дөн ашык кызматкеринин катышуусунда өттү.

Спартакиаданын максаты – Кесиптик бирликтин мүчөлөрүн спорт менен машыгууга кызыктыруу; дене тарбиянын кесиптик бирлик уюмдарынын кызматкерлеринин ден соолугун чыңдоо үчүн эң маанилүү каражат экендигин пропагандалоо. 

Спорттук иш-чаранын программасында катышуучулар үчүн жамааттын башын кошкон жана жакындаткан спорттук мелдештер; азыркы дүйнөдө кесиптик бирликтердин ролу жөнүндө маалыматты кеңейтүүгө жардам берген окуп-үйрөтүүчү лекциялар; катышуучулар ырдап, бийлеп, маданий деңгээлдерин толуктай алган оюн-зоок программасы уюштурулган.

Спартакиаданын жыйынтыктарын чыгарып жатып, ККБФ төрагасы Мурадил Жумадилде уулу бардык жеңүүчүлөрдү куттуктап өттү:

«Спартакиадабыз көңүлдүү жана ынтымактуу атмосферада өткөнү абдан кубандырууда. Үч күндүн ичинде ар бир катышуучу өзүнүн жөндөмдүүлүктөрү менен жеңишке карай умтулуусун көрсөттү. Баарыңыздарга катышкандыгыңыздар үчүн терең ыраазычылык билдирем. Бул Кыргызстан кесиптик бирликтер федерациясы өзүнүн мүчөлөрү үчүн уюштурган биринчи масштабдуу спорттук жарыш жана иш-чара жыл сайын өтүп турат деп ишенем. Дагы бир жолу жеңишиңер менен куттуктайм», – деп жыйынтыктады сөзүн Мурадил Жумадилде уулу.

Спартакиаданын жеңүүчүлөрүнө кубоктор, акчалай сертификаттар жана грамоталар тапшырылды.