2024-жылдын 7-октябрында Эл аралык эмгек уюмунун (ЭЭУ) делегациясынын мүчөлөрү Кыргызстан кесиптик бирликтер федерациясынын (ККБФ) кеңсесине келип, ККБФ төрагасы жана мүчө уюмдардын жетекчилери менен жолугушту.
ЭЭУ делегациясынын курамына ЭЭУ Бюросунун Европа жана Борбор Азия секторунун башчысы Сергеюс Гловацкас, ЭЭУнун Моквадагы бюросунун эмгекчилердин ишемрдүүлүгү боюнча адиси Гоча Александрия кирген.
ЭЭУ делегациясынын мүчөлөрүнө салам жолдоо менен, ККБФ төрагасы Мурадил Жумадилде уулу мындай жолугушуунун Бишкек шаарында биринчи ирет оффлайн форматта жана ККБФнын мүчө уюмдарынын жетекчилеринин катышуусу менен өтүп жаткандыгын белгилеп өттү.
Мурадил Жумадилде уулу Кыргызстан кесиптик бирликтер федерациясынын ишмердүүлүгүнүн актуалдуу өңүттөрү, ошондой эле социалдык-эмгектик чөйрөдөгү иштер, ЭЭУ стандарттарына ылайык социалдык адилеттүүлүктү жана татыктуу эмгекти камсыздоо багытындагы иш-аракеттер тууралуу айтып берди.
“Бүгүнкү күндө Кыргызстан кесиптик бирликтер федерациясында Федерациянын ишмердүүлүгүн оптимизациялоого жана санариптештирүүгө, глобалдашууну жана мезгилдин чакырыктарын эске алуу менен түзүмдүк элементтерин жана функцияларын өзгөртүүгө багытталган бир катар иш-аракеттер жүрүп жатат.
Мүчө уюмдарды бекемдөө максатында, айрым тармактык комитеттерди жоюу жана бириктирүү иштери аткарылып, азыркы тапта 26 уюмдун ордуна 17 мүчө уюм болуп калды. Мунун баары бири-биринин функцияларын кайталаган комитеттердин болбошу жана аларды чыңдоо максатында ишке ашырылып жатат.
Кесиптик бирликтердин облустук кеңештеринин баары Кыргызстан кесиптик бирликтер федерациясынын филиалдары болуп өзгөртүлдү. Мындан ары мүчөлөрдүн эмгек жаатындагы талаштары менен көйгөлөрүнүн жеринде жана тезирээк чечилишин камсыздоо үчүн өлкөнүн бардык аймактарында өкүлчүлүктөрүбүз иштейт. Муну менен катар эле, жалпы өлкө боюнча техникалык жана укуктук инспекторлордун саны көбөйтүлдү, себеби кесиптик бирликтин негизги функциясы – эмгекчилердин укуктарын коргоо жана эмгекти коргоо.
1229 кыска номери ишке киргизилди. Бул номерге чалып, акысыз консультация жана кызыктырган суроолорго жоопторду алууга болот.
ККБФнын келечекте кесиптик бирликтердин мүчөлөрүнүн эмгек укуктарын татыктуу коргой билген, жогорку квалификациялуу кадрларды, жолун жолдоочуларды тарбиялап чыгаруу максатында жаштардын арасында квалификацияны жогорулатуу, жаштар саясатын илгерилетүү боюнча иш алып барган Жаштар кеңеши бар. ККБФнын гендердик маселелер жана аялдардын эмгек чөйрөсүндөгү көйгөйлөрүн чечүү багытында иш алып барган Аялдар кеңеши ишке киришти.
Мындан тышкары, кесиптик бирликтин мүчөлөрүнүн пайдасы жана ыңгайлуулугу үчүн дисконттук карталары киргизилди. Мындай арзандатуу картасын кесиптик бирликтин ар бир мүчөсү ала алат жана тиешелүү уюмдардан жакшы арзандатууларга ээ болот.
Кыргыз Республикасынын Балдар укуктары боюнча ыйгарым укуктуу өкүлү жана Кыргыз Республикасынын Акыйкатчысы менен макулдашууга кол коюлду. Макулдашуунун алкагында кыргызстандыктар үчүн чоң мааниге ээ бир катар долбоор ишке ашырылмакчы.
Ушул жана көптөгөн башка иштерди кыска убакыттын ичинде аткарып жетиштик. Ал эми планыбызда эмгекчилердин укуктарын коргоо, эмгекти коргоо, эл аралык кызматташтыкты чыңдоо боюнча дагы көптөгөн долбоорлор бар жана биз аларды сөзсүз жүзөгө ашырабыз.
Убакыттын өтүшү менен мындай бириктирүүнүн эмгекчилердин пайдасына аткарылган иштер менен далилдене турганына терең ишенем”, — деп жыйынтыктады сөзүн Мурдил Жумадилде уулу.
Өз кезегинде, Сергеюс Гловацкас Кыргызстанда ЭЭУнун №190 Конвенциясынын колдонулушунун маанисин белгилеп өттү.
«Конвенция – бул эмгек чөйрөсүнүн эволюциялык мүнөзүн эске алган келечектүү жана новатордук инструмент. Кыргызстан быйылкы жылы ЭЭУнун №190 Конвенциясын ратификациялады.
«Эмгек чөйрөсүндө зомбулукту жана ыдык көрсөтүүнү жоюу жөнүндө» №190 Конвенция – эмгек чөйрөсүндө ыдык көрсөтүү көрүнүштөрүнө жана зомбулукка чекит коюуга арналган маанилүү эл аралык инструмент. Бул Конвенциянын ийгиликтүү жүзөгө ашырылышы үчүн кесиптик бирликтер өздөрүнүн мүчөлөрүнүн жана жалпы эле коомчулуктун кабардар болуусун жогорулатып, аларга маалымат бериши, ошондой эле кызматкерлерди зомбулукка каршы күрөшүү үчүн бириктириши керек.
Мындан тышкары, Федерация ЭЭУнун «Жалданма эмгек жөнүндө» №177 конвенциясын, ЭЭУнун «Эне-баланы коргоо жөнүндө» №183 конвенциясын жана ЭЭУнун «Эмгек гигиенасына көмөктөшүүчү негиздер жөнүндө» №187 конвенциясын ратификациялоону демилгелеп жатат. Биз аталган конвенциялар ратификациялангандан кийин эмгекчилердин укуктары мындан да жакшы корголот деп ишенебиз.
Кесиптик бирликтердин эң негизги социалдык өнөктөшү – КР Эмгек, социалдык камсыздоо жана миграция министрлиги менен биргелешкен иш-аракеттердин жүргүзүлүп жаткандыгы баарыбызды кубандырат. Кыргыз Республикасынын Балдар укуктары боюнча ыйгарым укуктуу өкүлү жана Кыргыз Республикасынын Акыйкатчысы менен макулдашууларга кол коюлуп жатат. Жаштарга эмгекти коргоо жана эмгекчилердин укуктарын коргоо жөнүндө маалымат берүү боюнча пландалган долбоорлордун баары ишке ашат деген ишеничтемин», — деп жыйынтыктады сөзүн Сергеюс Гловацкас.