Кыргызстан кесиптик бирликтер федерациясында жүргүзүлүп жаткан реформалар тууралуу ККБФнын төрагасы Мурадил Джумадилде уулу Кесиптик бирликтердин жалпы конфедерациясынын семинар-кеңешмесинде айтып берди. КЖКнын мүчө уюмдарынын жетекчилеринин катышуусундагы иш-чара бүгүн, 21-октябрда Москва шаарында өттү.
Семинарды КЖК Башкы катчысы Виктор Пинский ачты. Ал бардык катышуучулар менен саламдашып, БРИКСтин XIII Кесиптик бирликтер форумуна катышуусу жөнүндө докладын окуду.
Семинарда сөз сүйлөп жатып, Кыргызстан кесиптик бирликтер федерациясынын төрагасы глобалдык чакырыктар орун алган шарттарда эмгекчилердин кызыкчылыктарын коргоо үчүн эл аралык кызматташтыктын маанисин баса белгилөө менен, семинарга чакыргандары үчүн ыраазычылыгын билдирди.
«Быйылкы жылдын соңку 9 айындагы ишмердүүлүгүбүздүн башкы жыйынтыктары менен бөлүшүп кетейин. ККБФда маанилүү түзүмдүк өзгөрүүлөр болду. Оптимизациялоонун натыйжасында ККБФнын мүчө уюмдардын саны 26дан 17ге чейин кыскарды. Бул ишибиздин натыйжалуулугун жогорулатуу багытында маанилүү кадам болду.
Соттук талаштарда жетишкен ийгиликтер ишмердүүлүгүбүздүн маанилүү өңүттөрүнүн бири болду. Акыркы айларда ККБФнын юридикалык бөлүмү бир катар соттук териштирүүлөрдө эмгекчилердин укуктарын коргой алды, ошондой эле кесиптик бирликтин мыйзамсыз сатылып кеткен объектилеринин кайра кесиптик бирликке кайтарылышын камсыздады.
Мындан тышкары, кесиптик бирлик ишин санариптештирүү боюнча программабыздын алкагында маанилүү бир нече долбоор баштатылды. Тактап айтсак, 1229 ыкчам линиясы ишке кирди. Эмгекчилер күнү-түнү дебей бул номерге чалып, акысыз консультация ала алышат. Ошондой эле онлайн-консультациялар системасы дагы ишке киргизилди. Натыйжада акысыз юридикалык жардам көрсөтүү процесси кыйла жеңилдеп калды.
Жогорудагылар менен катар, электрондук документ жүгүртүмү жана кесиптик бирликтердин мүчөлөрүн онлайн-каттоо системасы ийгиликтүү иштей баштады. Булар менен бюрократиялык процедуралар кыйла азайып, ишибиздин ачык-айкындуулугу жогорулады.
Кесиптик бирликтердин мүчөлөрү үчүн арзандатуулар программасы өзгөчө көңүл бурууга татыган социалдык долбоорлордун бирине айланды. Демилге мүчөлөрүбүзгө ар кандай товарлар менен кызматтарга арзандатууларды жана жеңилдиктерди алуу мүмкүнчүлүгүн жаратты», — деп белгиледи Мурадил Джумадилде уулу.
Ошондой эле ККБФнын төрагасы Федерациянын окуу-методикалык борборунун ишмердүүлүгү тууралуу айтып берип, 2024-жылдын январь айынан октябрь айына чейин ОМБ тарабынан өлкөнүн түрдүү кесиптик бирлик уюмдарынын 670 мүчөсүн камтыган бир катар окутуу иш-чараларынын уюштурулганын белгиледи.
Муну менен катар, Эл аралык Эмгек Уюму менен тыгыз кызматташтыкты чыңдоо жана улантуу жаатында иш-аракеттер аткарылып жатканына, ага ылайык кесиптик бирликтер тарабынан эмгекчилердин укуктарын коргоо үчүн ЭЭУнун бир катар конвенциясын ратификациялоо боюнча демилгелерди көтөрүп жатканына, эмгек рыногунда глобалдык өзгөрүүлөргө,
Жаштар кеңешинин ишмердүүлүгүнө жана жаш кадрлардын квалификациясын жогорулатууга, «жашыл» жумуш орундарын жана жашыл экономиканы өнүктүрүүгө багытталган долбоорлорду колдоого токтолду.
Сөзүн жыйынтыктап жатып, Мурадил Джумадилде уулу, акыркы 9 айдын ичинде кесиптик бирлик кыймылын реформалоо боюнча масштабдуу иштер аткарылганын, жетишилген натыйжалардын туура багыт тандалганын далилдеп турганын жана Кыргызстан кесиптик бирликтер федерациясы өлкөнүн эмгекчилеринин жыргалчылыгы үчүн иш алып барууну уланта турганын белгилей кетти.
Семинар-кеңешменин алкагында Наталья Подшибякина дагы доклад окуду.
Семинар-кеңешменин алкагында ККБФнын төрагасы Мурадил Джумадилде уулу Кесиптик бирликтердин жалпы конфедерациясынын президенти Александр Корчагин менен жолугушту. Жолугушуунун жүрүшүндө Мурадил Джумадилде уулу менен Александр Корчагин эл аралык кызматташтыкты өркүндөтүүгө жана аймактагы кесиптик бирлик кыймылын чыңдоого байланыштуу маселелерди талкуулашты.