Төрага
Итикеев Ляйлякбек Тургунбекович
Кыргыз Республикасынын энергетика жана электротехникалык өнөр жай кызматкерлеринин кесиптик бирлиги
1931-жылдын март айында электротехникалык өнөр жай кызматкерлеринин алгачкы кесиптик бирлиги түзүлгөн. Жумушчулардын заводдордогу жана устаканалардагы оор эмгектик шарттары, ошондой эле арзыбаган эмгек акысы аталган тармакта кесиптик бирликтин уюштурулушунун башкы себеби болгон. Жумушчулар биригүү жана өз укуктарын биргелешип коргоо зарылдыгын сезишкен.
Согуштан кийинки мезгилдерде элдик чарба дүркүрөп өсүп, жаңы ишканалар ачылган, экономика тынчтык жолунда активдүү өнүгө баштаган. Энергетика тармагы өнүгүп, электротехникалык өнөр жай ишканалары пайда болгон. Тармактын ирилешүүсү менен динамикасы баштапкы кесиптик бирлик уюмдарынын санынын өсүшүнө, жана натыйжада кесиптик бирлик мүчөлөрүнүн көбөйүшүнө жол ачкан. Тармактык түзүмдүн трансформацияланышынан улам, 1955-жылы Профсоюздардын бүткүл союздук борбордук кеңешинин (ВЦСПС) катчылыгынын токтому менен электр өнөр жай кесиптик бирлиги жоюлуп, анын функциясын энергетика кызматкерлеринин кесиптик бирлиги уланткан. 1997-жылы Конференцияда «КР энергетика жана электротехникалык өнөр жай кызматкерлеринин кесиптик бирлиги» БКУ түзүү жөнүндө чечим кабыл алынган.
Бириндеген кесиптик бирлик ячейкаларынан түзүлгөн кесиптик бирлик өнүгүүнүн татаал жолунан өттү, социалисттик жарышты уюштуруу, ойлоп чыгаруучулук жана рационализация маселелеринин үстүнөн, кызматкерлер үчүн талаптагыдай эмгек жана жашоо шарттарын түзүп берүү боюнча активдүү иш алып барды, новаторлор менен өндүрүштүн алдыңкы кызматкерлеринин слетторун өткөрдү, насаатчылык кыймылын өнүктүрдү, социалдык тармакты өнүктүрүүгө көмөктөштү, спорттук жана маданий-массалык иш-чараларды, кызматкерлер менен алардын үй-бүлө мүчөлөрүнүн ден соолугун чыңдоо үчүн шарттарды уюштурду.
КР энергетика жана ЭТӨ кызматкерлеринин кесиптик бирлиги эмгек жана жумуш менен камсыз кылуу боюнча мыйзамдар жаатындагы мамлекеттик саясатты иштеп чыгууга, анын ичинде тийиштүү ченемдик-укуктук актыларды иштеп чыгууга активдүү катышат, эмгекти коргоо талаптарынын аткарылышына коомдук көзөмөл жүргүзөт, кызматкерлердин эмгектик укуктары менен кызыкчылыктары бузулган учурларда аларды коргоо боюнча чараларды көрөт, иш берүүчүлөргө кызматкерлеринин ден соолугун чыңдоого багытталган иш-чараларды жүзөгө ашырууга, алардын социалдык көйгөйлөрүн чечүүгө көмөктөшөт.
Кесиптик бирлик активдүү эл аралык ишмердүүлүк жүргүзөт, «Электропрофсоюз» ЭКБ курамына кирет, түрк тилдүү мамлекеттердин энергетиктеринин кесиптик бирликтери менен өнөктөштүк мамилелерди түзгөн.
КР энергетика жана ЭТӨ кызматкерлеринин кесиптик бирлигинин жетекчилери
Асанкулова Сапия Асанкуловна, 24.01.1937-жылы туулган, 1964-жылы Фрунзе политехникалык институтун бүтүргөн, билими боюнча инженер-электромеханик. 1981-жыл – ССР Энергетика министрлигинин Жетекчи кадрлардын квалификациясын жогорулатуу институту. Эмгек жолун 1964-жылы Аламүдүн ГЭСнин каскадынын өндүрүштүк-техникалык бөлүмүнүн инженери кызматынан баштаган. Энергонадзордун энергия сатуу бөлүмүнүн инженери, абоненттик кызматтын, сатуу бөлүмүнүн, энергоинспекция бөлүмүнүн начальниги болуп эмгектенген. 1983-жылдан 1986-жылга чейин – Энергетика кызматкерлеринин кесиптик бирлигинин төрайымы. 1986-жылы Энергонадзордун директору, Бишкек ЭТИнин директорунун сатуу боюнча орун басары кызматына дайындалган. С.А.Асанкулова КР энергетика тармагынын өнүгүшүнө зор салымын кошкон, мамлекеттик сыйлыктар жана ардак грамоталары менен сыйланган. «КМШнын эмгек сиңирген энергетиги» наамы ыйгарылган.
Султамуратов Асанкан Султамуратович, 01.01.1936-жылы туулган, 1959-жылы Фрунзе политехникалык институтун аяктаган, билими боюнча инженер-электрик. Эмгек жолун 1964-жылы Аламүдүн 5-6 ГЭСтеринин башкаруу щитинин нөөмөтчүсү кызматынан баштаган. Ар кандай инженердик кызматтарда иштеп, райондук электр тармактарын башкарган. 1973-жылдан 1986-жылга чейин – Чүй электр тармактары ишканасынын директору. 1986-жылдан 2017-жылга чейин – Энергетика жана ЭТӨ кызматкерлеринин кесиптик бирлигинин республикалык комитетинин төрагасы. А.С.Султамуратов Кыргызстандын энергетика тармагынын жана кесиптик бирликтер кыймылынын өнүгүшүнө чоң салым кошкон, мамлекеттик сыйлыктар жана ардак грамоталары менен бир нече ирет сыйланган. «Кыргыз ССРнин эмгек сиңирген энергетиги» наамы ыйгарылган.
Осмонов Шамил Канатович, 09.09.1955-жылы туулган. 1981-жылы Фрунзе политехникалык институтунун энергетика факультетин бүтүрүп, Жалал-Абад шаарынын курулуш материалдары комбинатынын электроцехинин начальниги, башкы энергетиги болуп эмгектенген. 1996-жылы Кыргыз мамлекеттик улуттук университетинин юридикалык бөлүмүн «Укук таануучу-менеджер» адистиги боюнча бүтүргөн. 1982-жылдан 2016-жылга чейин – Курулуш материалдары комбинатынын директорунун орун басары, Жалал-Абад тамеки-ферментациялык заводунун директору, «Интерагро» ТКК башкы директору, «Жүзүм Шарап» АК президенти, «Кыргызалко» МАК башкы директорунун биринчи орун басары, «Бишкек ликер-арак заводу» АК директору, Чүй ЭТИ директорунун орун басары, «Электр станциялары» ААК башкы директорунун орун басары, «Түндүкэлектро» ААК башкы директорунун орун басары, башкы директору, Бишкек ш. ЖЭБнин директорунун кеңешчиси. 2016-жылы КР энергетика жана ЭТӨ кызматкерлеринин кесиптик бирлигинин төрагасы болуп шайланган. Кыргызстандын энергетика жана башка тармактарын, ошондой эле өлкөнүн кесиптик бирликтер кыймылын өнүктүрүүгө зор салымын кошкон. Мамлекеттик жана ведомстволук сыйлыктар менен сыйланган.
Итикеев Ляйлякбек Тургунбекович, 17.10.1959-жылы туулган. 1981-жылы Фрунзе политехникалык институтунун энергетика факультетин бүтүргөн. 1981-жылдан 1984-жылга чейин Талас ЭТИнин инженери, ага инженери болуп иштеген. 1984-жылы СССР мамлекеттик коопсуздук органына аскердик кызмат өтөөгө чакырылган, запастагы полковник. 1986-жылы Москвадагы Ф.Э.Дзержинский атындагы КГБ жогорку мектебин бүтүргөн. 1993-жылдан 2013-жылга чейин – Кыргыз Республикасынын УКМ, УКМКсында жетекчилик кызматтарда иштеген. 2013-жылдан 2024-жылга чейин Бишкек ЖЭБнин директорунун кеңешчиси, «Түндүкэлектро» ААК Директорлор кеңешинин мүчөсү, «Нарын СГЭМ» ААК Директорлор кеңешинин мүчөсү, КР энергетика жана ЭТӨ кызматкерлеринин кесиптик бирлигинин республикалык комитетинин укуктук инспектору. 2024-жылдын январында КР энергетика жана ЭТӨ кызматкерлеринин кесиптик бирлигинин төрагасы болуп шайланган. Мамлекеттик жана ведомстволук сыйлыктардын ээси. 2013-жылы «Талас облусунун чыгаан атуулу» наамы ыйгарылган.
Байланыш маалыматтары: 0312 66-06-44
Биздин дарек: Бишкек ш., Чүй пр., 207