Бүгүн Кыргыз-Түрк “Манас” университетинин окуу залында «Жаштардын эмгек укуктары жана милдеттери» аттуу мазмундуу жана пайдалуу семинар болуп өттү.

Иш-чарага Кыргызстан кесиптик бирликтер федерациясынын Жаштар кеңешинин төрагасы Кайрат Тороев жана коммуникация факультетинин студенттери катышты.

Семинардын жүрүшүндө Кайрат Тороев жаштардын эмгек мыйзамдары боюнча укуктары, иш берүүчү менен кызматкердин ортосундагы мамиле, эмгек келишиминин өзгөчөлүктөрү жана кызматкердин негизги милдеттери тууралуу кеңири маалымат берилди. Катышуучулар өздөрүн кызыктырган суроолорду берип, практикалык мисалдар аркылуу жооп алышты.

Айрыкча студенттер үчүн эмгек келишимин туура түзүү, мыйзамсыз жумуштан бошотуу учурлары жана социалдык кепилдиктер боюнча түшүндүрмөлөр абдан кызыктуу болду. Семинар интерактивдүү форматта өтүп, катышуучулар талкууга активдүү аралашышты.

Иш-чаранын соңунда билимди бекемдөө максатында “Kahoot” платформасы аркылуу кызыктуу оюн уюштурулду. Студенттер суроолорго жооп берип, өз билимдерин текшеришти. Оюн семинарга өзгөчө шаң берип, катышуучулардын кызыгуусун арттырып, жеңүүчүлөр белектер менен сыйланды.

Мындай иш-чаралар жаштардын укуктук сабаттуулугун жогорулатууга жана келечектеги кесиптик ишмердүүлүгүндө өз укуктарын коргой билүүсүнө чоң салым кошот.