Балдарды коргоонун эл аралык күнүнө карата Кыргызстан кесиптик бирликтер федерациясы, Саламаттык сактоо кызматкерлеринин кесиптик бирлиги жана Бишкек шаардык билим берүү кызматкерлеринин кесиптик бирликтер комитети менен биргеликте профсоюз мүчөлөрүнүн балдары үчүн көчмө медициналык клиника уюштурду.
Иш-чара Бишкек шаарындагы №84 орто мектептин базасында өткөрүлүп, ага ар түрдүү тармактардагы кесиптик бирликтердин мүчөлөрүнүн балдары катышты. Күн бою балдар тажрыйбалуу дарыгерлердин акысыз кароосунан өтүп, керектүү медициналык кеңештерди алышты.
Балдар педиатрдын, оториноларингологдун (ЛОР), стоматологдун кабыл алуусунда болуп, ошондой эле УЗИден өтүштү. 50 ашык бала ден соолугун текшертип, адистерден пайдалуу сунуштарды алуу мүмкүнчүлүгүнө ээ болду.
Акцияны өткөрүүгө И.К.Ахунбаев атындагы Кыргыз мамлекеттик медициналык академиясынын адистери чоң колдоо көрсөтүп, балдарга сапаттуу медициналык кеңештерди беришти.
Саламаттык сактоо кызматкерлеринин кесиптик бирликтин төрагасы Каарманбек Байдавлетов белгилегендей, балдардын ден соолугу — өлкөбүздүн келечегинин негизи. Мындай демилгелер өсүп келе жаткан муундун ден соолугун чыңдоого жана коомдогу социалдык жоопкерчиликти арттырууга өбөлгө түзөт.
ККБФ жаштар кңешинин төрагасы Кайрат Тороев куттуктоосунда:
«Ар бир бала ден соолукта, бактылуу болуп, ата-энесинин жана коомдун камкордугунда чоңойсун. Балдардын укуктарын коргоо жана алардын ар тараптуу өнүгүүсүнө шарт түзүү — биздин негизги милдеттерибиздин бири», -деп белгиледи.
Бул иш-чара кесиптик бирликтердин, медицина кызматкерлеринин жана билим берүү тармагынын өкүлдөрүнүн биргелешкен аракетинин натыйжасында ийгиликтүү өтүп, балдардын ден соолугуна кам көрүүнүн маанилүүлүгүн дагы бир жолу көрсөттү.
