114-Эл аралык эмгек конференциясынын Женева шаарында өтүп жаткан сессиясынын алкагында Кыргызстандын расмий делегациясынын курамындагы ККБФ төрагасы Мурадил Джумадилде уулу Кыргызстандын эмгекчилеринин укуктарын жана мыйзамдуу кызыкчылыктарын коргоого байланышкан демилгелерди илгерилетүү жана эл аралык кызматташтыкты чыңдоо максатында Эл аралык эмгек уюмунун (ЭЭУ) жетекчилери менен жолугушту.
Жолугушуулардын негизги максаты — Кыргыз Республикасынын эмгекчилеринин кызыкчылыктарын эл аралык деңгээлде илгерилетүү, эмгек укуктарын коргоо жаатындагы кызматташтыкты кеңейтүү жана социалдык өнөктөштүктү өнүктүрүү боюнча биргелешкен аракеттерди күчөтүү болду.
Эл аралык эмгек уюмунун Башкы директору Жильбер Унгбо менен болгон жолугушууда тараптар Кыргызстандагы эмгек рыногунун учурдагы абалын, татыктуу эмгек шарттарын камсыз кылуу маселелерин, социалдык коргоо механизмдерин өркүндөтүү жана эл аралык эмгек стандарттарын ишке ашыруу багытындагы кызматташтыкты талкуулашты.
Андан соң федерациясынын төрагасы ЭЭУнун Башкы директорунун Аппаратынын жетекчиси Беатрис Андрес менен жолугушту. Жолугушууда кызматташтыкты тереңдетүү, биргелешкен долбоорлорду ишке ашыруу, социалдык диалог институттарын бекемдөө жана кесиптик бирликтердин мүмкүнчүлүктөрүн кеңейтүү маселелери талкууланды.
Тараптар эмгекчилердин укуктарын коргоо боюнча эл аралык тажрыйбаларды колдонуу, социалдык өнөктөштүктү өнүктүрүү жана эмгек мамилелерин өркүндөтүү боюнча пикир алмашышты.
Ошондой эле ЭЭУнун Чыгыш Европа жана Борбор Азия өлкөлөрү боюнча директору Питер ван Роой менен жолугушуу өткөрүлдү. Анда регионалдык кызматташтыкты өнүктүрүү, тажрыйба алмашуу, эмгек мамилелерин өркүндөтүү жана эмгекчилердин социалдык-экономикалык абалын жакшыртууга багытталган демилгелерди ишке ашыруу маселелери каралды.
Өткөрүлгөн жолугушуулар Кыргызстан кесиптик бирликтер федерациясынын эл аралык деңгээлдеги өнөктөштүгүн чыңдоого, эмгекчилердин укуктарын коргоо боюнча жаңы мүмкүнчүлүктөрдү түзүүгө жана өлкөдөгү социалдык-эмгек чөйрөсүн мындан ары өнүктүрүүгө багытталган аракеттеринин маанилүү бөлүгү болуп саналат.
