Кыргызстан кесиптик бирликтер федерациясынын төрагасы Мурадил Джумадилде уулу Эл аралык эмгек уюмунун (ЭЭУ) биригүү эркиндиги жана уюмдашуу укугун коргоо жөнүндө №87 Конвенциясынын аткарылышы боюнча отчетун сунуштады.
Отчет ЭЭУнун алкагындагы иш-чараларда сунушталып, анда эл аралык эмгек стандарттарын сактоо жана кызматкерлер, иш берүүчүлөр менен мамлекеттин ортосундагы социалдык өнөктөштүктү өнүктүрүү маселелери каралды.
Отчетто белгиленгендей, мурда Кыргыз Республикасында №87 Конвенциянын жоболорун ишке ашыруу боюнча айрым маселелер жана талкуулар болгон. Алар негизинен кесиптик бирликтер тууралуу мыйзамдарды реформалоо жана профсоюздардын көз карандысыздыгын камсыз кылуу маселелерине байланыштуу эле. Бул темалар Эл аралык эмгек уюмунун катышуусунда бир нече жолу эл аралык деңгээлде талкууланган.
Бүгүнкү күндө мамлекеттик органдардын, кесиптик бирликтертердин, иш берүүчүлөрдүн жана Эл аралык эмгек уюмунун ортосундагы конструктивдүү диалогдун натыйжасында мурда көтөрүлгөн маселелердин басымдуу бөлүгү жөнгө салынды. Кыргызстан өзүнүн эл аралык милдеттенмелерине ылайык улуттук мыйзамдарды жана аларды колдонуу практикасын мындан ары да өркүндөтүүнү улантууда.
Мурадил Джумадилде уулу Федерация социалдык өнөктөштүктүн принциптерин чыңдоону, эмгекчилердин укуктарын коргоону жана көз карандысыз кесиптик бирликтер кыймылын өнүктүрүүнү колдой турганын белгиледи. Анын айтымында, №87 Конвенциянын талаптарын сактоо татыктуу эмгекти камсыз кылуунун жана өлкөнүн туруктуу социалдык-экономикалык өнүгүүсүнүн маанилүү шарты болуп саналат.
Жыйындын катышуучулары Кыргызстандагы социалдык диалогдун өнүгүшүндөгү оң өзгөрүүлөрдү белгилеп, эмгек укуктарын жана жарандардын эркиндиктерин мындан ары бекемдөө боюнча кызматташууну улантууга даяр экендиктерин билдиришти.