Кесиптик бирликтер Федерациясынын кызматкерлеринин жана баштапкы уюмдардын төрагаларынын кесиптик потенциалын чыңдоо жана эл аралык кызматташтыкты өнүктүрүү максатында Кыргызстан Кесиптик бирликтер федерациясынын кызматкерлери Өзбекстандын Кесиптик бирликтер федерациясынын Квалификацияны жогорулатуу институтунда окуудан өтүштү.
Бул окуу Кыргызстан Кесиптик бирликтер федерациясы менен Өзбекстандын Кесиптик бирликтер федерациясынын ортосунда кол коюлган кызматташтык жөнүндө Меморандумдун алкагында уюштурулуп, эки өлкөнүн профсоюздук кыймылынын байланыштарын бекемдөөгө жана тажрыйба алмашууга багытталган.
Окуу программасы профсоюздук уюмдардын ишин уюштуруу, социалдык өнөктөштүк, жамааттык келишимдерди түзүү, эл аралык жана улуттук эмгек стандарттары, эмгекти коргоо, профсоюздардын укуктук ишмердүүлүгү, эмгек инспекциясынын иш тажрыйбасы жана уюштуруу иштерин камтыды. Ошондой эле катышуучулар Өзбекстандын баштапкы профсоюздук уюмдарынын практикалык ишмердүүлүгү менен таанышып, сертификаттарга ээ болушту.
Мындай кызматташтык профсоюз кызматкерлеринин кесиптик билимдерин өркүндөтүүгө, заманбап иш тажрыйбаларын өздөштүрүүгө жана эки өлкөнүн профсоюздарынын ортосундагы өнөктөштүктү мындан ары да бекемдөөгө өбөлгө түзөт.
